غيثي16

*اتى كالغيث في حياتي❤️✨*
*انقذني من براثين زوج امي ليدخلني في براثينه?✨*

 

*#بقلم_مروه_احمد*

 

انا عاينت ليها وقلت ليها وانا ما مصدقه... شنو؟؟.... غيث قال لي بإبتسامه حامل.... غمضت عيوني وسندت راسي وانا بفكر في اللي بيحصل لي.... المفروض اني اكون مبسوطه... ما انكر انو انبسطت شويه.. بس برضو بقيت افكر لمن يتولد حيعيش كيف؟؟.... حيعيش كيف وابوهو وامو مطلقين؟؟.... انا جربت فقدان الاب عشان كدا ما عايزاهو يجرب نفس شعوري.. وفي نفس الوقت ما عايزه ابعد عنو..... ومستحيل ارجع لغيث تاني... قاطع تفكيري صوت ماما نوال وهي بتقول ليه مهمله نفسك كدا يا بتي؟؟.. الدكتور قال الدوخه الكتيره دي بسبب عدم الأكل يا بتي.... نور قالت فعلا انا كمان لاحظت ليكي في المطعم رفضتي تاكلي نهائي قدر ما حنسناكي ابيتي.... ماما نوال قالت لا لا الكلام دا تاني ما ينفع... في روح تانيه لازم تهتمي بيها... غيث قال ليهم ممكن يا جماعه تخلونا لحالنا؟... كلهم طلعو وبقينا لحالنا... غيث قال لي وجدان.... انا رديتك..... قلت ليهو ومين قال ليك انا حاوافق؟؟..... غيث قال لي وجدان... عشان بس ما يعيش من غير ابوهو او امو... مشيها المره دي بس.... قلت ليهو لا معليش.... هو حيعيش معاي انا... وانت وقت ما تحب تعال شوفو ما مشكله..... بس اني ارجع ليك لا.... وانت عارف السبب.. غيث اتنهد بعدين قعد جمبي ومسك يدي وقال لي وجدان... حاولي بس المره دي عشانو هو ما عشاني.... بس عشان ما يعيش مشرد ببناتنا انا وانتي.... انا سكت مسافه وقلت ليهو انا ما حاغير رأيي يا غيث..... قال لي طيب تمام... ما مشكله.. ما ترجعي لي... بس خليكي عارفه انو حيعيش معاي انا تمام....وخلاني وطلع وقفل الباب بقوه..... انا حطيت يدي على بطني وبقيت ببكي.

.........................

برا اول لمن طلعو ماما نوال قالت بإبتسامه البيبي دا جا في وقتو.... هو الل حيرجع علاقتهم زي زمان..... رغد قالت ليها بس برضو ما تنسي انو وجدان في امتحانات... يعني ما حتقدر تتحمل.... تغريد قالت بالعكس وجدان قويه ما شاء الله عليها وبتقدر تتحمل.. حتشوفي بنفسك.... رغد قالت ما اتوقع غيث يخليها تكمل اصلا..... ماما نوال قالت ليه ما يخليها حيخليها غصبا عنو.... هو اصلا حاليا ما عندو حق يفرض اي حاجه عليها.. احمد قال ليهم ان شاء الله تقوم بالسلامه بعد داك الله كريم... كلهم عاينو ليهو بإستغراب... قال ليهم مالكم بتعاينو لي كدا؟؟.. ما تنسو انو هي حامل بحفيدي الاول... يعني مهما كنت ما بطيقها حاحاول اتصالح معاها.... في اللحظه دي غيث طلع من الغرفه وهو معصب... احمد قال ليهم خليكم هنا انا ماشي اتكلم معاها شويه.. كلهم هزو ليهو راسهم... بعدين عاين لماما نوال وقال ليها تعالي معاي يا نوال وفعلا الاتنين دخلو لي.... انا مسحت دموعي وقعدت كويس... احمد قال لي انا عارف انو انتي هسي ماخده فكره سيئه عني ومعاكي حق... قلت ليهو لا لا بالعكس.... انت انسان طيب من جواك شديد..... واكبر دليل انو انت بتكرهني شديد.... بس عمرك ما حاولت تأذيني.... ابتسم لي وقال لي والله يا بتي ريحتيني بكلامك دا وطمنتيني انو انتي ما ماخده عني فكره سيئه.... المهم... غيث يا بتي..... اديهو فرصه يا بتي.... بس عشان الطفل اللي في بطنك يا بتي.. ما ينفع يعيش من غير اب.... او من غير ام وامو وابو الاتنين حيين... ماما نوال قالت لي ايوا يا بتي... ما ضروري تسامحي غيث.. بس ارجعي ليهو عشان طفلك.... وانا اوعدك حيكون ليكي غرفه براكي.... سكت مسافه وانا بفكر في كلامهم... لقيت انو ما عندي حل تاني غير اني اوافق.... قلت ليهم طيب حارجع ليهو.... عم احمد قال لي عفارم عليكي يابتي... كنت متأكد انك عاقله وحتختاري الخيار الصح... يلا يا نوال نخليها ترتاح واتصلي على غيث كلميهو... وفعلا طلعو وماما نوال اتصلت على غيث كلمتو.. 10 دقايق ولقيت غيث داخل الغرفه مبسوط ومعاهو كيس في يدو..... قلت ليهو ما تفرح شديد كدا... على فكره انا راجعه ليك بس عشان الطفل اللي في بطني ما اكتر...... وحاقعد في غرفه براي..... غير كدا مافي..... قال لي بنفس الابتسامه عارف.. امي كلمتني.... وشال الكرسي وحطاهو جمبي قلت ليهو طيب مالك هسي؟؟... قال لي هسي انا ما جايي ليكي انتي... انا جايي لولدي.. واظن دا من حقي..... اتنهدت ورقدت وعاينت للناحيه التانيه.... قال لي لا لا... لازم تاكلي الاول... مافي نوم.... قلت ليهو اظن دي بطني انا... قال لي واظن برضو انو ولدي في بطنك....اتأفأفت بعدين قمت قعدت فتح الكيس وطلع لي ساندوتش..... مديت يدي عشان اشيلو لقيتو مداها ناحيه فمي... رفعت ليهو حاجبي وقلت ليهو قول لي كمان ولدك في فمي... شلت منو الساندوتش وبديت اكل... اكلت لقمتين وحسيت اني شبعت... جيت عايزه احطو قال لي لا لا... كلي.. عشان ما تدوخي مره تانيه..... مسك الساندوتش من يدي وبدا يأكلني هو.. زهجت منو عشان كدا سكت وخليتو يأكلني.... لمن خلصت الساندوتش شربت عصير ورقدت.... ومن غير ما احس نمت.... شويه وحسيت زول بيشيلني.... فتحت عيوني لقيتو دا غيث... اتنهدت وعرفت انو ما حيرضى ينزلني عشان كدا سكت وخليتو... نزلنا وجايي يركبني عربيتو قلت ليهو استنى.... انا حاركب مع سامر اريح لي.... غيث سفهني وكمل طريقو وركبني عربيتو وتاني نور ركبت معانا..... وصلنا قدام باب العماره جايي ينزل قلت ليهو على فكره انا عندي رجلين عادي بمشي بيهم.... ابتسم وقال لي طيب بكره الصباح حاجي اسوقك عشان اردك.. قلت ليهو تمام... نزلنا انا ونور وطلعنا فوق لقيت اشرف واقف وشكلو كان منتظرني... قال لي بقلق مالك اتأخرتي؟؟... قلت ليهو غيث حيردني... عاين لي وسكت ما قال حاجه.... قلت ليهو ما تخاف ما مجبوره........ دخلت جوا ونور وسامر دخلو معانا.. قعدو اتونسو شويه بعدين استأذنو وطلعو.... انا دخلت الغرفه وطوالي رقدت نمت.......... صحيت تاني يوم بصوت التلفون بيدق.... عاينت لقيتو دا غيث... اتنهدت وقعدت كويس ورديت وقلت الو؟؟... قال لي الو... اها جاهزه اجيكي؟؟... قلت ليهو اي.. قال لي تمام انا في الطريق اصلا... قلت ليهو تمام... دخلت الحمام واستحميت واتوضيت طلعت صليت الفجر ولبست فستان لونو كحلي.... واسبورت وطرحه لونهم ابيض شلت تلفوني وحاجاتي كلها ونزلت تحت استنيتو شويه زي 5 دقايق... جا وقال لي لي نزلتي؟؟ كنتي تستنيني.... قلت ليهو زي ما قلت ليك عندي رجول اقدر امشي بيها...ويلا بسرعه لانو عندي قرايه.... قال لي طيب.... ركبت معاهو ومشينا رداني بعدين مشى مطعم... نزل جاب لي اكل وانا صراحه كنت جعانه... اكلت لمن شبعت.... رجعنا البيت ونزل حاجاتي من العربيه ودخلها جوا... انا دخلت لقيتهم فعلا جهزو لي غرفه.... بس المشكله انها جمب غرفه غيث... يعني برضو حاشوفو كتير.. اتنهدت وقلت لنفسي يلا ما مشكله على الاقل طلعت من غرفتو..... مشيت طلعت غرفتي حطيت حاجاتي كلها فوق السرير بعدين مشيت غرفه رغد الاتنين حضنوني واتونسو معاي شويه بعدين انا قلت ليهم يلا ارح على القرايه.... رغد قالت لي لا من الليله نذاكر في غرفتك عشان ما تقعدي تمشي كتير.... قلت ليها طيب ارح... مشينا غرفتي وبدينا قرايه.... شويه والباب دق.... لبست طرحتي وغطيت نفسي كويس وقلت اتفضل... جات داخله نور... قمت حضنتها.... قعدنا الاربعه نذاكر سوا لحدي ما سامر جا اخد نور... واصلا كنا خلصنا قرايه ماده بكره.... كل وحده مشت غرفتها ونمنا... تاني يوم صحيت بدري قمت مشيت دخلت الحمام استحميت واتوضيت ولبست الزي المدرسي وطلعت لقيت غاده واقفه قدامي.... اتأفأفت بعدين جيت عايزه اتكلم لقيت الباب بيفتح... عاينت لقيتو غيث.... غيث عاين لغاده وقال ليها انتي بتعملي شنو هنا؟؟.... غاده ما ردت عليهو وخلتو ومشت.... قال لي عملت ليكي حاجه؟؟... قلت ليهو لا لا... بس ياريت تقول لمرتك ما تدخل غرف الناس من غير اذن.... بعدين انت جايي هنا ليه؟؟.... غيث قال لي جايي اصبح على ولدي... اتنهدت وقلت ليهو طيب.... مسكت المشط وقعدت فوق الكرسي وبقيت اسرح في شعري..... غيث جا قعد قدامي ودنقر وباس بطني وقال صباح الخير حبيب ابوك......... بعدين زح وقال لي صباح الخير ليكي انتي كمان.........كملت تمشيط وما رديت عليهو... عملت شعري كعكه بعدين لبست الطرحه مشيت شلت الكتاب ودفتر المراجعه ونزلت تحت..... صبحت عليهم بعدين جيت عايزه اكب الشاي رغد قالت لي انتي اقعدي محلك انا بكب ليكي...... وفعلا قعدت وهي كبت لي شربنا الشاي بعدين طلعنا..... قعدنا نراجع سوا لمن وصلنا....... دخلنا جوا وقابلنا نور وكملنا مراجعه سوا.... لحدي ما وقت الامتحان جا... دخلنا وبدينا نمتحن... والحمدلله المره دي كمان الامتحان كان ساهل.... لمن الزمن انتهى طلعت مبسوطه شديد والبنات كمان كانو مبسوطين لان الكلام اللي راجعناهو سوا قبل الامتحان هو بس اللي جا.... مشينا طلعنا برا لقيناهم منتظرننا.... سألونا حلينا كيف واحنا قلنا ليهم كويس شديد...... ماما نوال كانت عامله لينا ساندوتشات عشان بنطلع جعانين... وزعت لينا وفعلا قعدنا ناكل..... انا حسيت نفسي تعبت شويه عشان كدا مشيت قعدت في العربيه..... غيث جاني وقال لي بقلق.. انتي كويسه؟؟.... اوديكي المستشفى؟؟.... قلت ليهو لا لا... شويه وحابقى كويسه... هز لي راسو وقال لي طيب تحبي نرجع البيت؟؟.... قلت ليهو ياريت..... قال لي تمام انا حامشي اكلم امي انو احنا حنسبقهم.... هزيت ليهو راسي وقلت ليهو طيب... وفعلا مشى كلمها وانا بعاين ليهو من بعيد... شفت غاده جات اتكلمت معاهو شويه بعدين جو هم الاتنين...... ركبو ومافي زول اتكلم وغيث ساق العربيه...... رجعنا البيت ودخلنا جوا... انا طوالي مشيت دخلت غرفتي...... مشيت شلت ملابسي ودخلت الحمام استحميت وطلعت..... رقدت فوق السرير وطوالي نمت... عدت فتره الامتحانات وما حصلت حاجه مهمه والامتحانات كان فيها الصعب وكان فيها الساهل.. اليوم كان اخر يوم امتحان..... طلعت من الامتحان وانا مبسوطه من اللي اشتغلتو وزي كل مره بنقيف كلنا سوا ونشوف اللي اشتغلناهو صح ولا لا..... بعدين مشينا طلعنا برا وطمناهم..... المره دي غيث كان عندو شغل عشان كدا ما رجع معانا البيت مشى طوالي على المستشفى...... طلعت غرفتي وطوالي رقدت نمت..... صحيت صليت كل اللي فاتني... بعدين نزلت تحت ودخلت المطبخ عشان اشوف لي حاجه اكلها... اكلت بعدين مشيت قعدت في الريسبشن ومسكت تلفوني وبقيت بلعب بيهو..... فجأه لقيت الباب بيفتح وعم محسن ماسك غيث وبيدخلو جوا البيت...... انا قمت بقلق ومسكتو معاهو وقلت ليهو مالو؟؟.... قال لي والله يا بتي ما عارف اقول ليكي شنو...... ليهو فتره كل يوم بيجي راجع متأخر وسكران زي ما انتي شايفه..... سكت ما قدرت ارد.... لانو يمكن اكون انا السبب... ما عارفه..... مشينا لغرفتو دقينا الباب عشان غاده تفتح بس لا حياة لمن تنادي.... جربنا نفتح الباب بس الباب كان مقفول.... فكرت مسافه بعدين قلت لعم محسن وديهو معاي غرفتي... وفعلا وديناهو الغرفه ورقدناهو فوق السرير......عم محسن استأذن ومشى..... انا اتنهدت بعدين رقدت فوق الكرسي وقعدت اعاين ليهو..... بعدين قلت لنفسي لا ما حاقدر اسكت.... قمت ومشيت عملت قهوه وجبت مويه وطلعت فوق الغرفه تاني.... كبيت في وشو المويه وهو قام مخلوع.....عاين لي وما اتكلم.... مديت ليهو القهوه وقلت ليهو امسك..... اللي جابك منو؟؟.... اكيد جيت براك صح؟؟... جيت براك وانت سكران......ياخي اذا ما خايف على نفسك خاف على ولدك...... لو حصل ليك حاجه لا قدر الله ولدك حيعيش من غير اب....... وبعدين انت ما عارف انو اللي انت بتعملو دا حرام؟؟.... هااا..... ما عارف؟؟.... السم اللي انت بتشربو دا غير انو ممكن بسببو تعمل حاجات وانت ما واعي ممكن يدخلك النار...... حتقول لربنا شنو يوم القيامه؟؟... هو كان بس ساكت وبيعاين لي.... فهمت انو لسه ما واعي... مشيت عليهو وقلت ليهو قوم.... فعلا قام مسكتو من يدو ودخلتو الحمام... وقلت ليهو استحمى يمكن تفوق...... وطلعت من الحمام وقفلت الباب..... شويه وسمعت صوت المويه..... اطمنت ومشيت رقدت فوق السرير بتعب..... استنيتو واستنيتو عشان لو فاق اطلعو من الغرفه..... بس لقيت نفسي نمت................ تاني يوم صحيت وانا حاسه بحاجه تقيله فوق بطني..... فتحت عيوني لقيتو حاطط راسو فوق بطني ونايم.... قمت بسرعه مخلوعه..... وهو زاتو اتخلع...... قلت ليهو انت بتعمل هنا شنو؟؟.... ااا..... قبل ما اتم كلامي لقيت غاده فتحت الباب بقوه...... عاينت لغيث وقالت بصوت عالي لمن البيت كلو جا بسبب صوتها....كنت متأكده اني حالاقيك هنا.... مالكم مش عاملين زعلانين من بعض... هسي مالكم؟؟.... غيث قال ليها بعصبيه.... غااااده... اطلعي برا....... غاده قالت ليهو ما بطلع.... عم احمد قال ليها غااااده.... وجدان مرتو زي ما انتي مرتو..... اتفضلي اطلعي..... غاده قالت ليهو انت يا عمو بتقول الكلام دا؟؟..... عملت ليكم شنو البت دي خلتكم كلكم تحبوها فجأه.... هااا؟؟..... غيث عاين لرامز بعدين عاين لي مشى شال التوب حقي بعدين مسكني من يدي وسحبني ودخلني الحمام وقفل الباب وراهو..... مسك التوب وجايي عايز يلبسني ليهو مسكتو منو وقلت ليهو بلبسو براي..... وفعلا لبستو براي.... طلعنا من الغرفه لقيناهم طلعو غاده وطلعو.... حدرت لغيث بعدين طلعت........ مشيت غرفه رغد لقيتها بتلعب بتلفونها.. قلت ليها يا رغد معليش حادخل حمامك..... رغد قالت لي طوالي ما مشكله...... اتذكرت اني ما شلت ملابسي.. قلت ليها خلاص خلاص.. بيكون هو زاتو طلع من الغرفه....طلعت من غرفتها ودخلت غرفتي لقيتو فعلا طلع.....شلت ملابسي من الدولاب واستحميت ولبست فستان طويل وواسع ومريح لونو بنفسجي..... طلعت من الحمام وانا بنشف شعري.... لقيت كيس هدايا محطوط فوق السرير... استغربت بعدين مشيت فتحتو لقيت فيهو دبدوب وعلبه توكس❤️?.... وبتحت في علبه كدا صغيره.... شلتها وفتحتها لقيت فيها سلسله وساعه وخاتم....السلسله من النوع اللي تفتحها تلقى جواها في صوره... فتحتها بفضول لقيت صورتي انا وغيث في عرسنا....... ابتسمت من غير ما احس..... شلتها لبستها ?..... شويه وسمعت صوت الباب بيدق..... فتحت الباب لقيتو دا غيث... رفعت ليهو حاجبي وقلت ليهو دي رشوه يعني ولا كيف؟؟؟...... قال لي وهو بيضحك... لا لا... يا ستي دي هدايا لولدي..... مسكت السلسله اللي في رقبتي ورفعتها وقلت ليهو ودي برضو لولدك؟؟... وبعدين اللي عرفك شنو انو حيكون ولد... عاين لي بإبتسامه وقال لي ما مهم ولد ولا بنت... المهم انو منك انتي?... بعدين افهم من كدا انو انتي قبلتي الهديه.. رفعت حاجبي وقلت ليهو القال ليك منو اني قبلت... عاين لي بنظره خباثه??? بعدين عاين للسلسله وقال لي طيب ليه لبستيها؟؟..... سكت وما رديت?????..... ما لقيت لي رد.... ضحك بعدين قال لي خلاص طيب حاسكت?.... بعدين حط يدو على بطني وقال سلام يا قلب بابا..... وخلاني ومشى..... مشيت لبست توبي ونزلت تحت...... لقيت غاده بتعاين لي بنظره ما بتطمن... سفهتها وقعدت معاهم... بقينا نتونس.... عمي احمد قال لينا يلا يا جماعه لازم نحتفل بمناسبه نهايه الامتحانات....ماما نوال قالت اي والله ارح الليله نطلع نحتفل.... احمد عاين لينا وقال لينا اها عايزين تمشو وين؟؟... ولا اوديكم الشاليه؟؟ َ... رغد وتغريد قالو ليهو بحماس اي...اي عليك الله..... قال ليهم خلاص طيب... انا اصلا كلمت ناس تمشي تنضف الشاليه امبارح..... هسي حيكونو خلصو........ جهزو شنطكم وكل واحد ياخد اجازه من شغلو اسبوع كدا وحنرجع......... كلهم قالو تمام..... غيث قال ليهو حنسافر بالعربيه ولا نأجر باص؟؟..... عمي احمد قال ليهو نأجر عربيه كبيره تشيلنا كلنا بس.... رامز قال ليهو ياحاج... انا ما حاسوق من هسي وريتك عشان تكون عارف بس ?✋...... عمي احمد قال ليهو اصلا انت ما منك فايده?.... ما تخاف مكلم لي زول حيجي يسوق هو.....سماهر قالت ليهو ليه ما محسن موجود.... احمد قال ليها لا لا محسن حيكون ضيف معانا بس.... ياخد اجازه شويه تعويض من اللي بيشوفو منكم?.... ماما نوال قالت ليهو اي والله ما مقصر معانا نهائي♥️.... غيث قال ليهو طيب انا حامشي اخد اجازه من الشغل وبالمره اأجر العربيه..... عمي احمد قال ليهو طيب... بس بسرعه ما تتأخر... غيث قال ليهو طيب وطلع.... رغد قالت ليهو يا ابوي عادي نعزم صحباتنا؟؟.... احمد قال ليها طوالي... لو كدا اتصل على غيث يا رامز وقول ليهو يأجر باص ما عربيه صغيره..... رغد قامت وباستو وقالت ليهو شكرا يا احسن اب في الدنيا.... ارح يا وجدان ويا تغريد نكلم البنات... اتصلنا على ابتهال وتسنيم ونور ومريم وصحباتها و اصحابها بس لقوهم مشغولين.. بس مريم وتسنيم ونور وابتهال هم اللي حيجو....وسامر كمان بعد تحانيس وافق يجي.... . بعدين طلعنا اول حاجه غرفه رغد?.... جهزنا معاها ملابسها بعدين غرفه تغريد برضو ساعدناها بعدين لمن جو عايزين يدخلو غرفتي قلت ليهم هووي بجهز براي?✋..... رغد قالت لي بذوقك الزباله دا ما حنخليكي ?✋(بوووووم????)..... قعدوني فوق السرير وعملو لي شنطتي هم??.... بعدين طلعو لي ملابس البسها هسي في المشيه... شلتهم ودخلت الحمام استحميت ولبستهم.... كانو فستان حلو وبسيط لونو بني مع طرحه واسبورت لونهم بيجي... طلعت من الحمام وانا حاطه الطرحه في رقبتي وبسرح في شعري لقيت رغد وتغريد لابسين وقاعدين يتجهزو في غرفتي.... قعدوني وعملو لي شعري ضفيره هنديه...... تغريد قالت لي التسريحه دي لايقه عليكي شديد والله.... رغد قالت اي والله.... ابتسمت ليهم..... هم كمان اتسرحو بعدين قعدنا نتصور...... رغد كانت لابسه بنطلون جينز وبلوزه طويله لونها ابيض واسبورت ابيض برضو... وعامله شعرها ضفيرتين.... تغريد كانت لابسه بنطلون جينز مع بلوزه زيتيه... واسبورت اسود.... وكانت عامله شعرها ضنب حصان.... شلنا شنطه صغيره غير الشنط الكبيره حطينا فيها حاجات ممكن تسلينا في الطريق..... شويه والبنات جو...... خليتهم يشيلو الشنط وانا بس شلت الشنطه الصغيره?✋... نزلنا اقصد نزلو الشنط وقعدنا كلنا مع سامر نتونس لحدي ما الباقي يخلصو..... انا اتذكرت انو غيث طلع من غير ما يجهز شنطتو... استأذنت بعدين طلعت فوق ووقفت قدام باب غرفتهم.. اترددت قبل ما ادق الباب... استنيت شويه بس ما كان في رد..... دخلت جوا سمعت صوت المويه في الحمام... فهمت انها لسه بتستحمى... مشيت فتحت الدولاب بسرعه وطلعت الشنطه وحطيتها فوق السرير وحطيت كل حاجه حيحتاجها غيث في السفر... وشلت شنطه صغيره وحطيت فيها الحاجات اللي حيحتاجها في الطريق والحاجات اللي بتتكسر.... بعدين طلعت بنطلون اسود وتيشيرت رمادي وطلعت ساعه لونها اسود والعطر اللي هو بيستخدمو واسبورت لونو اسود وحطيتو ليهو فوق السرير.... جيت عايزه اطلع من الغرفه لقيت غيث بيفتح الباب ويدخل..... قلبي عمل شححححح...... رفع حاجبو وعاين لي بس فهم لمن شاف الشنطه والملابس فوق السرير..... ابتسم لي وقال لي شكرا♥️.... هزيت ليهو راسي بعدين طلعت من الغرفه بس وقفت لمن اتذكرت غاده لسه في الحمام... عاينت ليهو وقلت ليهو تقدر تستخدم حمام غرفتي لو عايز.... وخليتو ونزلت.......... لقيتهم كلهم خلصو الا غيث وغاده.. واهل غاده وصحباتها كمان جو... شويه وغيث جا نزل.. قعدنا نتونس لمن غاده خلصت ونزلت....مشو حطو الشنط الكبيره في الباص بعدين جينا قعدنا نتونس لمن السواق اللي حيودينا وصل.... مشينا ركبنا كلنا في الباص....... اتحركنا وبقينا نتونس ونلعب كلنا سوا.... الا طبعا غاده وصحابتها... رفضو يلعبو...... شويه كدا وانا نعست... استأذنت منهم وقلت ليهم ماشه انوم... وقمت مشيت قعدت قدام وجيت عايزه انوم لقيت غيث جا قعد جمبي وفي يدو كيس...طلع من الكيس ساندوتش جبنه وعصير.... خلاني اكل بالقوه وشربني العصير بعدين قال لي يلا كدا نومي..... هزيت ليهو راسي بعدين سندت راسي على الشباك وغمضت عيوني عشان انوم جا مطب ولا حفره ما عارفه خلتني اضرب راسي بالشباك ضربه خفيفه..... مسكت راسي محل الضربه بعدين عاينت لغيث لقيتو هو زاتو مغمض عيونو عشان ينوم وما انتبه... اتأفأفت بعدين سندت راسي على كتفو ونمت...... ب ورا هم كمان نعسو... اتوزعو على الكراسي عشان ينومو.... تغريد كانت ماسكه تلفونها وبتلعب بيهو لانها ما كانت نعسانه.... لمن لقت مافي شبكه اتأفأفت ورفعت يدها فوق يمكن الشبكه ترجع..... سمعت صوت ب جمبها بيقول في الحته دي مافي شبكه ما تحاولي.... عاينت ليهو وهزت ليهو راسها... بعدين سألتو السؤال اللي نفسها تسألو ليهو من يوم شافتو مع نور ايام الامتحانات....قالت ليهو معليش بس انت ليه بتكلمني كانك ما طايقني.... سامر رفع حاجبو وقال ليها يعني انتي شايفه اني المفروض اعاملك كيف؟؟.... تغريد قالت ليهو بطريقه كويسه....على الاقل ما تكشر وانت بتتكلم معاي ( تغريد لمن كانت بتبكي ما ركزت في ملامح سامر كويس عشان كدا ما اتذكرتو). سامر قال ليها شكلك ما متذكره انا شفتك وين قبل كدا صح..... تغريد قالت ليهو بإستغراب لا والله.. انا شفتك قبل كدا؟؟... غاده كانت قاعده جمبهم وسامعه كلامهم كلو قامت ردت قبل ما يرد سامر وقالت بهمس اسكتي.. وطي صوتك ما تفضحينا... دا اللي طلعنا من الشقه يومتها.... تغريد فتحت عيونها بصدمه بعدين عاينت ليهو لقتو بيعاين ليها بقرف... خلتهم قاعدين بعدين مشت غيرت مكانها ومشت قعدت جمب ماما نوال......مريم كانت قاعده وسانده راسها على الكرسي وسرحانه.... شويه ولقت رامز جايي من قدام عليها... قعدت تحدر ليهو وقالت ليهو نعععم؟؟.... رامز حدر ليها ومد يدو وشال شنطتو من جمبها ورجع قعد محلو............................ بعد كم ساعه صحينا من النوم لمن الباص وقف في محطه...... انا قمت لقيت نفسي ماسكه يد غيث وسانده راسي على كتفو وهو ساند راسو على راسي (وين غاده ?)... فكيت يدو بعدين زحيت راسي بالراحه عشان ما يقوم من نومتو....... مشيت قعدت ورا مع البنات وبقينا نتونس... لحدي ما رامز وسامر جو وهم شايلين الساندوتشات والعصاير والمويات... وزعو علينا... الباص اتحرك تاني واحنا بقينا ناكل ونتونس...... شويه وغيث كمان قام من النوم.... جا قعد معانا واتونس معانا.. حتى رامز وسامر وامير كمان بقو يتونسو..... لحدي ما وصلنا الشاليه... نزلنا كلنا بعدين سامر وغيث ورامز وامير نزلو الشنط ودخلوها جوا... المكان كان واسع وحلو شديييد.... عمي احمد قال لينا الشاليه دا فيهو 8 غرف.... انا وسماهر في غرفه..... عمكم ومرتو في غرفه..... محسن في غرفه..... نوال في غرفه... غفران (اخت غاده) وصحبات غاده في غرفه.... وباقي البنات في غرفه والشباب في غرفه....وغيث وغاده في غرفه... وافقنا ومشينا غرفنا....... قعدنا نتونس لحدي ما الوقت اتأخر... بعدين قررنا نتفرج افلام.... انا ورغد مشينا المطبخ نجهز الحاجات وهم قعدو يلصقو السراير مع بعض لانو السراير بس 4 واحنا ما شاء الله 7?♥️.... لقينا فشار عملناهو... ولقينا كمان بارد وعصاير ولقينا كمان فطاير ولقينا حاجات كتيره بس احنا شلنا بس الفشار والبارد والعصاير .. انا قلت لرغد.. ماما نوال خلت في البيت شنو؟؟ ?.... قالت لي وهي بتضحك شكلها جابت التلاجه كلها معانا?.... شلنا الحاجات ومشينا دخلنا الغرفه.. شغلنا فلم ورقدنا كلنا في السرير وبقينا نتفرج.... اتفرجنا كتير لمن نمنا.... تاني يوم صحيت الصباح بدري لقيت بس تغريد مافي... والباقي كلهم نايمين... مشيت فتحت الشنطه لقيتهم حاطين لي بس يا بجامات قصيره وكدا او ملابس طلعه.. عبايه زاتو مافي... اتنهدت وطلعت لي جمبسوت (افرول) لونو اسود مورد بالوردي... وشبط وشنطه لونهم بيجي (حاحط الصوره)

وطرحه لونها وردي...... شلتهم ومشيت دخلت الحمام استحميت ولبستهم..... بقيت افتش في تغريد... ما لقيتها في الشاليه... قلت يمكن تكون في مكان قريب... طلعت من الشاليه وبقيت بفتش فيها....... لمن ما لقيتها قلت خلاص ارجع الشاليه وانا راجعه حسيت بحركه وراي.. بس قدر ما عاينت ما لقيت حاجه.... سرعت شويه عشان اوصل اسرع... ولمن قربت شفت غيث واقف قدام الشاليه وبتكلم بالجوال.. ارتحت شويه... جيت ماشه عليهو... واول لمن عاين لي طوالي جا جاري علي وبيصرخ ويقول اجري ... استغربت.. عاينت وراي لقيت واحد شايل سكينه وجاري علي... انا صرخت وجريت على غيث.... وقلت واااااي..... جريت حضنت غيث... غيث قال لي دقايق... وفكاني وجرا ورا الولد لانو الولد لمن شاف غيث هرب... انا خفت على غيث وجريت وراهو وبقيت اقول ليهو غيث... خليهو ياخي انت مالك... لمن تعبت وقفت شويه بعدين بقيت ماشه وراهو وانا حاطه يدي على بطني خايفه لو جريت تاني اقع ويحصل لي حاجه..... وانا ماشه شفت من بعيد واحد راقد في الأرض وحاطط يدو على كتفو بألم.. قلبي بقى يضرب بقوه.... جريت بسرعه ومشيت عليهو لقيتو دا فعلا غيث?.... مطعون في كتفو?.... مشيت قعدت جمبو وانا حاسه دموعي بتنزل وقلت ليهو غيث؟؟ ?

.............

الى اللقاء في الجزء القادم بإذن الله ♥️


E. Ahmed

17 Blog posts

Comments
Khalid Brigdar 17 w

نايس. ❤️.... منتظرين التكملة. ❤️

 
 
E. Ahmed 17 w

تم